النون الأولى من كتاب نون بكل أنواع التشكيل

النون الأولى نسمة و ناريمان

يا مرحبا

نون الاولى مركزة شوية !!! مش نون واحدة ولكنها  نوون!!!!

 يعني مش نون واحده دول اتنين نون 

يعني ايه؟ يعني اتنين ستات

الأولى نسمه ✨ والتانيه ناريمان 🔥 وكل نون منهم حكاية وشخصيه وهما مش اصحاب او اخوات لأنهم ….إيه ؟

يا نهار الوان …يا نهار ابيض واسود لا لا ده نهار جنان.

علشان نسهل على بعض نبدأ من الاول.. لان الحكاية دي عايزه روقان بزيادة، وتيجوا جنبي و تنبسطوا ومعاكم قهوه سادة 😎

ساده ايه بس !!! إيه اللي بقوله ده ؟ 

اصل انا بحب القهوة سادة….يووووه إيه اللي بقوله ده ؟!!! اصلي متلخبطه ….اشربوا القهوة اللي تحبوها….يوووه ….تاني ؟!!

قهوة إيه ؟ وأنا مالي بمزاجكم في القهوه؟

خلاص انا هحكي  الموضوع علشان تعرفوا انا متلخبطه 🤷‍♂️ ليه ؟

كان يوم خميس عادي جدا (لازم يكون خميس) نسمة ونانا ما ينفعش ييجوا غير يوم الخميس المهم ….ما اطولش عليكم …قولوا طولي…

كانوا آخر موعد عندي وعادة يوم الخميس  بخلص الشغل  بدري شوية الساعة ٥  

المهم الموعد كان بإسم مدام ناريمان( أو نانا زي ما هي بتحب )  ودخلت مدام نانا و معاها مدام نسمه 

وعلشان نعرف كويس ايه اللي هيحصل لازم اعرفكم بيهم واحب أبدأ بمدام نسمه  

ايه ده …؟

بس مش هي دي العميله بتاعتي ؟؟

لأ هي دي العميله بتاعتي…بس مش هي اللي الموعد كان باسمها 

ولا تعرف أي شيء عن اللايف كوتش ولا حتى سمعت عنه 

مدام نسمه سيدة في الخمسينات(حسب تقديري لمظهرها) ولابسة نظارة تدل على ضعف في النظر وشديدة النحافة و متوترة جدا.

 ولابسة لبس بسيط وعادي بدلة سوداء وبوط اسود علي الارض (من غير كعب)

وشعرها ملموم عادي ومش معمول سشوار ولا حاجه، بس عموما ده شكلها 

ومفيش اي مجوهرات لابساها خالص باستثناء دبله دهب رفيعة وصوتها هادي وواطي وفي لجلجة شوية في كلامها 

المهم…….

رحبت بيهم وقلت اهلا بيكم

تحبوا اساعدكم بإيه؟ 

ردت نانا بصوت فيه امر و عطف وشفقه …وقالت “اتكلمي يا نسمة “

ايه ده ؟؟؟؟؟

انا لسة ما وصفتش نانا !!!!! 

ايوه انا عارفه ..اومال اعمل ساسبنس إزاي ؟؟

خلينا نشوف نسمة وبعدين نتكلم عن ناريمان لوحدها 😉

نسمة اتكلمت وقالت 

“عندي ٤٧ سنة (كان تقديري لسنها غلط ) ودارسة صيدله بس ما اشتغلتش خالص وعندي ٤أبناء ولدين وبنتين وحاليا انا ارمله  جوزي فؤاد مات من  ٣ شهور و٩ ايام” 

طبعا انا رديت  “الله يرحمه”

وردت نسمة وقالت ” شكرا “

كملت كلامها 

 ” فؤاد جوزي كان مهندس ديكور مشهور والله يرحمه كان شديد قوي ومتحكم وكان لازم يعرف كل صغيرة وكبيرة في البيت … وده كان من أول يوم في جوازنا وكان ممنوع أشتري أي شيء في البيت،

 هو اللي كان بيجيب كل حاجه للأولاد او حتى حاجاتي الشخصية وكمان ماكنش  مسموح ليّه  يكون معايا فلوس خالص الا لو سافر مثلا وتكون فلوس قليله جدا، بحجة ان كل حاجه في البيت وان دي فلوس للطوارئ 

حياتي  كلها معاه بالطريقه دي علي طول …

كان كل دوري البيت والاولاد بس. 

وحتي لما كنا بنروح شاليه الساحل لازم في الوقت اللي هو يحدده 

مع إنه  الشاليه كان ملكنا بس هو شايف ان الاولاد لو اتفسحوا كتير ده دلع وغلط

  وكمان  بيخلي السواق يودينا و يرجعنا في الوقت اللي كان جوزي يقرره 

وبطبيعة شغل فؤاد والظروف اللي حصلت ما بينا  كان دائما بره البيت 

وانا طول الوقت مع الأولاد 

وكان دائما الشغل واخد كل وقته زي ما كان بيقول لي الله يرحمه 

وبعد ما مات أصله  مات فجأة بحادثة عربيه لقيت نفسي مش عارفه اعمل اي حاجه في الدنيا غير الاكل  ورعاية الأولاد

حتي مش عارفه اسعار البقاله او هدوم الاولاد انا حتي مش عارفه ادفع فواتير الكهرباء والنت 

وكمان عمري ما روحت بنك في حياتي 

ودلوقتي مطلوب مني اعرف اعمل ده كله مره واحده 

انا بصراحه تائهه 😓😓😓

ولولا  وجود نانا في حياتي انا مش عارفه كنت هعمل ايه” 

وهنا تكلمت ناريمان وقالت “استني يا نسمة …انا هتكلم عن نفسي “

طبعا نسمة بتبص لنانا بالطاعة والإيجاب والثقة الغير محدودة 

وطبعا انا بسمع ومستنيه لانهم تقريبا عكس بعض 

عموما (مالكوش دعوه بكلامي )ههههه

الاول علشان نفهم لازم اوصف لكم ناااريمااان 

لازم اكتبها كده 😁😁😁 اصلها شكلها زي كده الممثلات في السينما لما بيحبوا يجيبوا ممثله اغراء بمعنى أنها ملفتة في كل حاجه… مع انها لابسه اسود برضو!!! 

بس مش كل الاسود هي ميكس كده من هند رستم علي ناس كتير كده مع بعض وجسمها كيرفي( ملفوف) كده في نفسه وشعرها طويل واسود لامع  وماكياج خفيف بس حلو ولبسها  مش عريان ولا حاجه بس فيه حاجه… وسنها تقريبا 

…..ايه ده؟ مش عارفه اقول سنّها ؟ 

انا ست وافهم لبس الست بس مش عارفه اقول سنها

وطبعا مجوهرات فى منتهى الشياكه وبارفان يجنن وريحته واصله للشوارع المحيطة من قوته (وطبعا انا ولا باين عليه اي انبهار )

واتكلمت نار……يمان او نانا 

“احب اعرفك بنفسي … 

انا اسمي ناريمان بس بحب الناس تندهلي بنانا (طبعا لازم تكوني نانا )ده انا اللي بقول 😂

اسمي نانا وعندي ولدين وعندي ٤٧ سنه (ايه ده ؟؟!!انا كنت فاكرها ٣٠ )

حاصله علي بكالوريوس تجاره بالعافيه

 وهي بتضحك قوي (واثقه في نفسها و فخورة قوي )ده انا اللي بقول 😆

وعندي محل انتيكات  صغير كده في وسط البلد كنت ورثته  من جوزي الاولاني ابو ولادي الله يرحمه “

وطبعا انا وراها “الله يرحمه “

طبعا انت مش عارفه ايه علاقتي بـ نسمة ؟!

انا ساكته طبعا 

قالت بهدوء وابتسامه الواثق من نفسه 

انا أرملة طليقها 😳😳😳….

آه… احنا الاتنين كنا متجوزين راجل واحد واحنا الاتنين دلوقتي ارامل نفس الراجل لان نسمه تعتبر ارملته في الواقع حتي لوكانت طليقته في الاوراق الشخصيه لانها ماتجوزتش حد تاني بعد فؤاد ولا تعرف راجل في حياتها بعده كمان …ما تستغربيش!!!” ( نانا اللي بتقول طبعا )

وطبعا جاوبت “مفيش اي استغراب نهائيًا دي حاجات بنشوفها في شغلنا كتير جدا ” (بكدب طبعا😜😜😜)

اتفضلي …كملي حضرتك  …..”

وقالت “أنا كنت الزوجه الثانيه لفؤاد بعد طلاقه لنسمه … اتعرّف عليه اول ما اترملت

كان بياخد من عندي شغل وبعدها بكام شهر اتقرب لي شويه وعرض عليه الجواز 

ووافقت… 

ما تستغربيش …

كان مناسب قوي اني اكون زوجه له لاسباب كتيره !!!

أولاً: قال انه مطلق مراته بس بيراعي بيته كأنهم متجوزين بالظبط

ثانيا: محدش من عيله مراته يعرف انهم منفصلين  وده كان طلب مراته 

ثالثا: هو بيبات في بيت ولاده (زي  ما كان بيقول ) يومين او تلاته في الاسبوع علشان نفسيه اولاده 

 

وبصراحه استغربت في الاول بس بعد كده أتطمنت له واتجوزنا 

ليه بقي ؟؟!!

علشان اسبابي انا كمان 

اولا 

عندي ولدين ولازم اربيهم واخلي بالي منهم 

ثانيا 

مش عايزه راجل لازق لي ٢٤ ساعه انا عندي شغل وعندي ولادي وعندي حياتي 

يبقى عند ولاده يوم وعندي يوم كده في الخفيف يعني 

ثالثا 

راجل ميسور الحال يعني مش طمعان فيه ولا هياخد فلوس ولادي 

رابعا

راجل يكون جنبي عشان يبعد عني اللي بيحلوّوا عليه وبيبقوا عايزين يتمرقعوا علشان انا كنت صغيره وحلوه (دي من عندي )وانا مش بتاعه مرقعة

خامسا 

برضو الست بتحتاج تبقى في حضن راجل وانا بحترم احتياجاتي طالما في الحلال والنور

 محدش له حاجة عندي، وعلي فكره انا عملت فرح حلو قوي كمان 

فؤاد ما قالش لنسمه في الاول ودي كانت رغبته هو 

وقال علشان عايز يمهد لها شويه ويقول لولاده 

وبصراحه فؤاد كان فرصه بالنسبه لي 

بس بعد سنه جواز لاقيته ما قالش لنسمه 

روحت انا باعته ولد من اللي بيشتغلوا عندي معاه جواب فيه صورة من قسيمة الجواز وطبعا نسمة عرفت وخلاص بقي امر واقع بالنسبة لها وله 

لان نسمة ما كانتش هدفي

انا كان هدفي فؤاد

 انه لازم ينفذ اللي اتفقنا عليه 

الراجل بيتربط من لسانه واللي قال عليه لازم يحصل بالذوق او بالعافيه مش مهم ولما واجهني اعترفت لانه هو اللي وصلنا لكده

 و بصت لنسمة وقالت لها “معلش يا نسمه مش قصدي اضايقك”

ونسمه ردت “لا مفيش حاجه” 

وقالت نانا “اصل نسمة غلبانه وما عملتش له حاجه لما عرفت 

وهي اصلا طليقته مش مراته  يبقي ايه لازمته يخبي ؟؟!!”

“وبعدها الامور مشيت عادي يوم عند الاولاد  ويوم عندي لحد ما قابلتها في النادي 

ورحت عندها وعرفتها بنفسي، وقلت لها ايه رايك نبقي اصحاب !!!!

طبعا نسمة اتخضيت !!! فاكره يا نسمة (وهي مبتسمه قوي)

 نسمة ردت “اه فاكره طبعا “(ابتسامه خفيفه من نسمه)

كملت نانا “بس بصراحه كان عندي سبب مهم لما شوفت نسمة 

كنت عايزاها تخلي بالها من نفسها وما تخليش فؤاد  يتحكم فيها لانه كان بيتحكم كانها مراته 

وكنت بسمع فؤاد وهو بيكلمها فى التليفون كنت بتغاظ علشانها 

اصل انا بصراحه محدش يقدر يتحكم فيّه

 فؤاد جرب في الاول مينفعش طبعا 

وهي بعد كده كانت بتحكي لي ازاي بيتحكم فيها وطبعا لو كان جرب بس يعمل فيّه  ربع اللي بيعمله فيها كنت وريته مقامه،

الله يرحمه بقى ،

وفؤاد كان عارف كده كويس 

 وكان دايما يقول لي انت قويه بس لو انا كنت اول رجل في حياتك كنت مشيتك على مزاجي 

وهو قالها مرة واحدة

 وقلت له خلاص اعتبر نفسك اول راجل في حياتي وبرضو مش هتتحكم  فيّه ولو مش عاجبك احنا لسه فيها 

و كنا متفقين اننا مش هنخلف علشان ما كنتش عايزه ارجع اربي في عيال تاني انا ما صدقت كبروا 

مع أنه بعد كده حاول يقنعني اننا نخلف بس انا موافقتش والحمد لله 

وكمان كل واحد فينا عنده اولاد يعني مالوش لازمه اصلا

انا بقي بسمع وساكته خالص وعايزه اقول فين المشكله 

بس اصلي حبيبت الموضوع قوي

 (بصوت محمد هنيدي)وبصوتي كمان 

“وبعدين”

 كملت نانا

 ” بصراحه فؤاد كان زوج كويس بالنسبه لي ولما كان يتعوج شويه كنت بحطه علي طريقتي على طول”

  ….هي بتضحك وانا كمان 

وطبعا نسمة ساااااااكته 

وبعدين كملت نا نا كنت برجعه تاني 

هو عارف انا بحبه بس مش محتاجاه وحتى لو محتاجه لا يمكن حد يذلني 

علي ايه يعني ؟

وكمان لو ما كانش اضافة ليّه  كزوج وصديق وحبيب 

 ويكون حريص على أنه يحافظ على المكانة دي عندي يبقي مالوش لازمة 

وكفايه عليّه ولادي وشغلي ونفسي كمان 

ومعاهم كمان اللي بيعاكسوني (مع ضحكه كلها ثقه وغرور)

حقها بصراحه 

وكملت نانا وقالت فؤاد كان ذكي وحافظ على مكانته عندي 

وهنا…

 انا اتكلمت 

تحبي أساعدك فى إيه ؟؟ 

ردت نانا وقالت بعد ما جوزنا مات في حادث الله يرحمه

 وجه المحامي علشان الميراث 

شكل نسمة كان صعب جدا خصوصا انها مش بتعرف تتصرف قوي، وحتى ولادها برضوا مش عارفين يتصرفوا في حياتهم او بمعني اصح في الوضع الجديد، لان فؤاد الله يرحمه علي الرغم من طلاقه لنسمه كان مسؤولً عن كل حاجه في البيت وعن نسمه حتي… وده كان اسلوبه 

وانا عايزه اساعدها عشان تعرف تعيش كويس وتخلي بالها من ولادها ومن نفسها 

المشوار لسه طويل 

وهي عندها بيزنس لازم تعرف تشغله 

انا ممكن اساعدها بس  برضو هي محتاجه حاجات تتغير فيها وترجع لنفسها عشان تنجح في حياتها

لأننا قسمنا الميراث خلاص

 بس برضو المكتب والشركة بتاع فؤاد الله يرحمه عايزه ناس مصحصحه 

وهي لها النصيب الأكبر فيه علشان فؤاد كاتب لها جزء من المكتب ومن الميراث علشان تكون متطمنه ويكون عندها مالها الخاص بعيد عن ميراث الاولاد

وعلشان كمان عايزاها تدير المكتب بنفسها هي والاولاد 

 وانا شخصياً عندي الشغل بتاعي ممكن اكبره شويه.  

اصلي مش بحب الشراكه في الشغل الصراحه

وكمان عندي ولادي هما حياتي وعايزه اركز معاهم 

علشان كده بصراحه انا عايزاكي تهتمي بنسمة 

رديت أنا “يعني مدام نسمه هي العملية بتاعتي ؟ وحضرتك بس موجوده علشان اول جلسة ؟”

ردت نان “فعلا بالظبط كده، نسمة محتاجه لايف كوتش علشان ترجع لنفسها وعشان تتخلص من آثار التحكم اللي كانت عايشه فيه هي واولادها” 

قلت لها “تمام، خلاص كده انا اخدت فكرة وممكن نرتب موعد الاسبوع اللي جاي مع مدام نسمه لوحدها علشان نبدأ الجلسات ان شاء الله” 

بعدها خرج الاتنين وانا كل علامات الاستفهام في عقلي 

ايه اللي انا شفته ده ؟!

ايه اللي بيحصل ده ؟! 

علي الرغم من ان حكاية نانا ونسمة غريبه بس الايام دي كل شيء متوقع !!!

بس كان نفسي يكون عندي رؤيه كامله بأبعاد القصه بصراحه، لأن  دي حاله مش بتتكرر كتير وكمان لان نانا  أو ناريمان شخصيه فعلياً مختلفه .

الجزء الروائي في شخصيتي يلفت نظره جدا الشخصية المتفردة أو المميزه بصفة عامة، وعلشان كده حبيت اعرفها عن قرب. 

علشان كده طلبت نانا وقلت لها اني عايزه اشوفها الاول لوحدها قبل موعد نسمة، وقد كان. 

حضرت نانا كما هي في كامل اناقتها وانوثتها وايجابيتها وطاقتها، وفي الموعد بالظبط .

وبعد التحيات والذي منه سألت نانا “انت ازاي خليتي العلاقة كده؟؟؟ واصلا ازاي اتجوزتي فؤاد ؟؟؟وازاي هي تقبلتك؟؟؟ علشان افهم العلاقة بينك وبين نسمة !!!

ردت نانا بهدوء “انا اتعودت ان الناس تستغرب، والحقيقة ان نسمة في البداية رفضتني جدا واستغربت جرأتي، ولما اتكلمت معاها بالعقل وأقنعتها وقلت لها خلينا عاقلين انا كده كده مراته 

 وعدم التفاهم بينا خسارة ليها، إنه بالعكس تقبلها للأمر ده ممكن يكون مكسب ليّه  ولو مكنتش اتجوزت فؤاد  كان هيتجوز برضو واحده  غيري!!! بس انا بقي غير اي واحده.

لاني معنديش مصلحه اني اضّرها او اغير منها.

والحقيقة أن نسمة عاقله جدا ويمكن علشان كده علاقتنا فضلت من غير فؤاد ما يعرف فتره طويله حوالي سنتين او تلاته. 

بس بعد ما عرف كان قلقان شويه في الاول من علاقتنا انا ونسمة 

خصوصا لو نسمه قارنت نفسها بيا او بمعني اصح 

بعلاقته معايا وعلاقته معها 

طبعا اختلاف واضح في كل شيءٍ بس في الاخر فؤاد بقي مرتاح.” 

وهنا انا قاطعتها “معلش يا نانا انتي اتجوزتي طليقها يعني انت كنت سبب انه ما رجعش لمراته الاولي 

سكتت نانا مع ابتسامه كلها ذكاء وكأنها بتقول انا عارفه

وسألتني “انت عايزة تفهمي وتعرفي ليه اتجوزت فؤاد ؟” 

قلت لها “بالظبط كده” 

ردت نانا “انا هاقول لك قصتي من البدايه، وساعتها هتقدري تعرفي ليه قبلت اني اكون زوجه له 

وليه سعيت انى اصاحب نسمة اللي هي كانت  الزوجة الأولي .

انا كنت بنت عادية من اسره عاديه واتجوزت جوزي عن قصة حب شبابي كده وجوازنا  كان شهر عسل قُصّيَر

وخلفت من اول سنه جواز ولدين توأم

وكانت سعادتنا بتكبر كل يوم مع ولادنا وانا اتجوزت وكان عندي ٢١سنه وهو كان ٢٨ سنه وكنا بدأنا في مشروعنا الصغير الجاليري ده علشان ده كان حلمنا 

وبعد ٣ سنين سعادة وهنا ، جوزي اكتشف انه عنده ضعف شديد في عضلة القلب مع انه كان رياضي ووسيم ويمكن اصعب حاجة كان بيعملها انه بيدخن وبعدها دخل المستشفى مره او اتنين وراح في اقل من ٦ شهور،

وطبعا تخيلي واحده ست عندها ٢٤ سنه ارمله ومعاها طفلين عمرهم ٣ سنين ومسؤوله عن شغل جوزي وتربيه ولادي… 

جوزي ما كانش مليونير بس كانت الحمد لله مستورة، وده كان معناه اني لازم اشتغل علشان اعيش وعلشان ما اكونش محتاجه لحد خصوصا انه كان عندنا شغلنا الخاص يعني مفيش معاش كمان 

وطبعا مش محتاجه اقول لك أرملة في سني ممكن تكون اتعرضت لإيه من القريب والبعيد من الرجاله اللي بتعاكس و طمعانه، ومن الستات اللي غيرانين وخايفين مني. 

والحقيقه اني أصلاً مكنتش شايفه غير ولادي وحب حياتي اللي راح.

 وكنت لازم اكون قد الموقف اللي ربنا حطني فيه. 

وفي أقل من شهر بعد وفاة جوزي شوفت دنيا تانيه عمري ما شوفتها قبل كده 

يعني عندك مثلا; اخو جوزي طلب يتجوزني علي مراته بحجة انه يربي العيال ويخلي باله من الشغل 

بس العيله عرفت، ومراته هدِت الدنيا عليّه وأتهمتني اني برسم عليه وعايزه اخطفه منها …

 وانا أصلاً كنت رفضته لانه مش ممكن اتجوز اخو جوزي ابدا لانه اخو حبيبي اللي راح فى احلى ايام عمرنا و حبنا 

و ده غير القرايب والمعارف اللي كانوا بيتقربوا لي  بحجة الأولاد وطبعا كان هدفهم يا إما اصحابهم او يتجوزوني عرفي او في السر 

وانا أصلاً في الحقيقه

 لا كنت عايزه اصاحب… ولا اتجوز… لا عرفي ولا رسمي

  كنت عايزه اربي ولادي على الأقل في المرحلة دي. 

وفوق كل ده محاولة اخويا التحكم فيّا.

المهم … الضغوط كترت عليه، والأبواب بدأت تتقفل قدامي من الاهل والاصحاب 

يا إما معاكسه من الراجل يا إما  غيره من مراته 

حتي لو مش بتعترف او بتجاملني، كنت بشوف في عينها اوعي تخونيني انا فتحت لك بابي اوعي تاخدي جوزي. 

وانا ولا عايزه راجل ولا زفت 

انا عايزه صاحبتي او قريبتي اتكلم معاها وافضفض معاها وحدتي وهمومي 

بعدين منعت نفسي عن الناس 

وقلت الناس  يزوروني احسن 

بس اللي حصل ان كمان محدش بقي بيزورني علشان اللي جوزها ما طالنيش منع مراته عني

 او ان السن نفسها خايفه تكون علاقتها قويه معايا احسن تفتح سكه لوجودي في حياتها الاسريه   وحاجات كتير من دي 

وعائلتي بقت زيارتهم تخنق علشان اخويا ومشاكلي معاه

 وبابا وماما اللي كل شويه يجيبوا لي عريس انيل من اللي بعده 

وفي الاخر رضيت بوحدتي مع ولادي وقفلت بابي عليّه 

حتي لو من بره  ماكانش باين عليّه  كل المعاناه دي  

بس انا كنت لوحدي 

لوحدي قوي قوي 

كنت بوصل اولادي تمرينات كرة  القدم للأطفال 

تصوري  لما تلاقي كل ترابيزه جنبي عليها تجمعات ستات وبيتكلموا وبيشوفوا ولادهم وانا لوحدي علي تربيزة

  لوحدي محدش حتي عايز يتكلم معايا من امهات الاولاد الا في حدود ضيقة قوي.. 

كنت تعبانه وزعلانه، بس كنت راضية قلت ربنا هيعوضني بولادي.

 ومشي الحال كده لمده سنتين  كمان بعد كده  

لحد ما فواد عرض عليا الجواز

 وعلي فكره 

هو الوحيد اللي عرض عليه الجواز من غير ما يقول عرفي او سري. 

عايزاكي بقي تشوفي الموضوع بحيادية 

انا وقتها كنت ٢٦سنة أرملة ووحيدة بجد، حتى لو عندي صاحبة أواتنين ممكن يكونوا لسه كويسين 

 لكن في الواقع مفيش وقت عندهم لان كل واحدة لها حياته 

وكمان انا الزوجه الثانيه مش الاولي اللي جوزها طلقها 

وده لصالحي 

بس تعرفي لو رجع بيا الزمن كنت ها شرط  عليه  أن نسمة  تعرف في الاول

 ويمكن كمان كنت أحب أسكن جنبها 

اصل نسمه طيبه قوي 

وزي ما انت شايفاها كده لا حول لها ولا قوة 

وكمان انا مينفعش اتجوز واحد فاضي ليّا علشان عندي شغلي وأولادي حياتي 

وهو كان مناسب جدا 

اولا مركزه مرموق وعمره معقول كان عنده ٤٠ سنه اما اتجوزنا

 وكمان ابقي ست متجوزه وده في مجتمعنا بيفرق كتير

علي الاقل  الناس ما بتخافش منها 

وتصدقي بقي… 

 أن الأبواب اللي كانت مقفوله قدامي قبل الجواز اتفتحت تاني وعلي الواسع قوي

 لإنه غني ولهم مع جوزي  مصالح بالأضافة أن ولادي كانوا محتاجين اب

 كانوا قربوا يبقوا سبع سنين وده سن مدارس ومكنتش عايزه ولادي يحسوا انه ماعندهمش اب

 وده كان شرطي عليه 

فؤاد كان اب كويس

 وكويس قوي لولادي

 وجاب  لي شقة كبيرة بإسمي في مكان راقي 

و هما كانوا مهري وشبكتي ومؤخري كمان وخلاص كده 

وعايزه الحق

 انا ما كنتش حبيته قوي ايامها  علشان كده اتجوزته لاني كنت خايفه احب حد او آجي علي ولادي علشان راجل 

لاني شوفت من ده كتير 

بس هو كان راجل كويس وحببني  فيه وولادي بيحبوه قوي وما يعرفوش غيره اب ليهم

والاولاد كلها زعلانه عليه ولادي وولاده 

وطبعا مشاكلي مع اخويا انتهت لانه كان خايف عليه بس بغباء 

وبس يا ستي دي كل الحكايه 

خلصت نانا كلامها

 وكانت عقلانية جدا وهي بتتكلم 

وكلامها فيه أبعاد كتير يمكن مننا كتير مش بيشوفها

 زي التحرش اللي اتعرضت له نانا

و الوحده اللي عاشتها وفقدان شريك الحياه 

وتجنب الناس ليها ووضعها دائما تحت الاتهام

وهي كانت الزوجه اللي كانت مش مزعجه لحياه اولاد جوزها حتي وهي بتقضي معاه نصف الوقت تقريبا بس هو قدر يبعد  عنها انصاف الرجال وأنصاف الأهل والأصدقاء من النساء 

ومش عايز فلوسها ووفر لها وقت لراعيه ولادها وشغلها وكان اب كويس لاولادها ووفر لها  حياة أسرية متكاملة 

ده رأي تحليلي ليًّه طبعا لطبيعه شغلي 

ورجعت سألت نانا وقلت لها 

انت ليه كنت مصره انك تتعرفي على نسمة؟

 مع انك مش محتاجه كده من الأساس 

ردت نانا وقالت 

هو كمان ما كانش عايزني اعرفها اصلا 

بس انا سمعت عنها منه كتير 

وكمان كنت بسمعه وهو بيكلمها فى التليفون وكان يعاملها معاملة غريبة 

يعني هو الآمر الناهي وهي تقبل عادي جدا مع انهم مطلقين 

ولعلمك 

هو جرب شويه كده في اول الجواز بس طبعا ما نفعش  معايا كده لاني مش نسمة ولا اقدر اكون زيها 

وهو كمان بطّل يعمل كده

لأني كنت واضحه معاه وخلاص 

بس نسمه كانت صعبانه عليه قوي وكنت عايزاها  تقف لنفسها شويه 

وده قلته لها لما في يوم من الايام  كانت بتلومني علي جوازي من فؤاد 

واضطريت اواجهها بالحقيقة

 نسمة عندها مشكله في انها مش عارفه تكون الزوجه بالمعنى الكبير

 يعني شريكه حياه مش عيّله  زياده فوق عيّاله 

وكمان قلت لها إن من وجهه نظري انا ما يناسبنيش غير انه يكون جوازي كده بمعني انه يكون زي فؤاد كده له ارتباط بشيء تاني غيري  حتى لو ده غريب من وجهة نظر الناس

 لان في الاخر دي حياتي واعرف اديرها كويس

بس انا بقي هقولك سر

( نانا اللي بتقول لي) 

انا عرفت من جوزي انها ملهاش اخوات ولا عيله بالمعني الحقيقي

هي وحيده وكل عيلتها بره مصر وده خلاني شوفتها من وجهه نظري انا  

انها محتاجه مساعده وكلامي كان صح 

وعلي فكره 

نسمه في الأول ما كانتش واثقه فيّه وبعدين بعد كده المواقف أثبتت صدقي 

وبعدين اتفاهمنا وبقينا اصحاب

 وبعد فتره كمان بقينا بناخد اجازات مع بعض علشان الاولاد والحال مشي لحد ما حصلت الحادثة وترملت تاني وولادي  فقدوا ابوهم تاني

بس الحمد لله ولادي كبار وبيبنوا مستقبلهم 

ولادي دلوقتي ٢٦سنه واحد خريج كمبيوتر ساينس والثاني طب اسنان

  وولاد  فؤاد ولد وبنت  ٢٥سنه الولد في تجاره انجلش  والبنت  فنون جميله وبنت تانيه عندها ٢٣

وعندي الولدين شكلهم كده بيحبوا البنتين وعايزين يتجوزوهم 

انا بقالي ٢١  سنه جواز 

الحمد لله 

بس المشكله في نسمة وولادها انهم بيتلخبطوا علي طول

وكمان  نسمة مكسوره اوي

 مش عارفه منه ولا منها ؟

اصل نسمة شايفه نفسها قليلة قوّي 

ان شاء الله امورهم تتحسن

بس خلاص كده 

بالنسبه لي ك نانا مش محتاجه كوتش 

انا محتاجه اروق دماغي وبس

ودي كانت القصه اللي قالتها نانا عن نفسها 

ومن وجهة نظر نانا 

بس انا بقي لسه عندي تساؤلات وهقولكم عليها

نانا ونسمه نفس السن تقريبا بس شكلهم مختلف جدا وطبعا شخصياتهم 

واحده اكبر من سنها اللي هي نسمة

  وواحدة  اصغر من سنها نانا طبعا 

٢. الفرق مش كبير في الجوازتين 

يعني فؤاد زي ما نانا بتقول اتجوزها بعد ما انفصل عن نسمة وهو اصلا كانت جوازته من نسمه  مش لفتره طويله يعني كان المفروض يكون لسه في شهر عسل مع نسمه 🤔

٣. نفس الشخص فؤاد  كان بأكثر من شخصية في دوره كزوج مع الاتنين  

 فؤاد جوز نسمة شخصية

و فؤاد جوز نانا شخصيه ثانيه بنفس الاسم والصفات ونفس البطاقة  ولكن مع اختلاف كبير في كل حاجه 

اعتقد ان لسه عندى حاجات كتير مش عارفه افهمها 

خليتها  لمًا اشوف نسمة علشان الصوره توضح اكتر

رتبت موعد مع نسمة بعدها بيومين وحضرت نسمة متأخر شويه عن موعدنا وبدأت الجلسة بحوار عادي عن الأحوال والجو والصحة والذي منه 

و ندخل في الجد 

نسمه بتتكلم عن نفسها بصوت واطي 

المهم 

قالت نسمه

انا خريجه صيدله وابويا وامي الله يرحمهم توفوا من كام سنه  ورا بعض 

وانا ماليش اخوات

 بس عندي قرايب معظمهم بره مصر والموجودين هنا بشوفهم من وقت للتاني وبنعيّد علي بعض في الأعياد وبنتقابل على فترات بعيدة 

اتجوزت  فؤاد قبل نتيجة البكالوريوس ما تظهر واتجوزنا  بسرعه

 وكان جواز صالونات و حياتنا كانت  جميله 

15//جوزي ميسور الحال وانا ماليا حالي كويس وورثت من اهلي كام حته ارض ومبلغ معقول في البنك وعندي ٣اولاد بنتين وولد  

رديت ربنا يحفظهم 

شكرتني نسمة 

وقالت انا عايزه احكي حاجات مش بعرف اقولها هل هتفهميني 

رديت طبعا اتفضلي 

دي احسن حاجه

 انا عايزه اسمع اللي جواكي 

رحبت نسمة وبدأت كلامها وكأنها بتكلم نفسها 

انا بنت وحيده

 كنت كل حياة بابايا ومامتي وحياتي مترتبة بطريقتهم

 واصحابي كانوا ولاد اصحابهم وحياتي كانت حياه بسيطه ومريحه ومفيش فيها مفاجآت كثيرة

 حتي جوزي كان عن طريق بعض المعارف واتجوزنا بسرعه  ولقيت نفسي في بيت مقفول عليّه مع راجل مش عارفاه

 و علاقتي بالرجال من خلال العيله والمعارف اللي برضو زي العيله 

ومعايا راجل مش عارفه هو عايز ايه ؟

وكمان معلوماتي الزوجيه صفر 

لاني كنت بنت وحيده ومش بعرف اعمل اي حاجه لوحدي من الأساس 

والحقيقه  هو كان متقبل ده لانه كان عارف ظروفي 

وكان عندي واحده بتساعدني في البيت بس حصل حاجه من اول جوازنا

 كان بيسألني عن حاجات كتير عايز رأيي  فيها 

تخصه وتخصني ودائما كنت بجاوب بإني مش عارفه

 لاني في الحقيقه مش عارفه 

او اللي يريحك

و ده  برضو لاني فعلا هاكون مبسوطه لوّ هو مبسوط 

بس حصل بعد كده سكوت غريب 

بطّل يسأل… وبقي بيقرّر

 بمعني مفيش رأي ليّه

 وكنت في الأول مش واخده بالي

 وبعدين بعد كده لاحظت اني بقيت في البيت زي عدمي

  انا بعمل المطلوب مني وما كانش فيه  مشاكل نهائي 

 بس كمان مكنش فيه حاجه تانيه 

البيت سِكْت قوّي (نسمه بتتكلم وهي سرحانه ) 

يعني انا وهو كنا ساكتين وهاديين وكنت فاكره ان حياتي نموذجية

  لحد ما قال لي انه عايز ننفصل  و ده في اوّل سنين جوازنا 

وطبعا كان طلبه ده صادم وجارح ليّه جدا 

سكت ووافقت بس طلبت منه محدش يعرف حاجه ولا حتي الاولاد 

وهو وافق وكان بيصرف عليا البيت كأنه متجوزني حتى طلباتي كان بيجيبها  ويمكن اكتر وكان بيبات  مع الاولاد ٣ ايام في الاسبوع لاننا ساكنين في فيلا صغيره وفيها جناح منفصل وهو كان بيعيش فيه والفيلا سابها لي 

بس كنت هعمل إيه ؟

ابويا كان مات أيامها ومامتي ست كبيره يعني بلاش اتعبها 

وهعمل  ايه في حياتي من غيره ؟ 

مش مشكله ماديه خالص 

دي مشكله انسانيه واجتماعيه 

وعلي فكره ما كانش فيه رد فعل 

انا كنت بفكر اواجه العالم ازًّاي؟

علشان كده تقبلت كلامه 

وما صدقت ان نانا طلبت تتعرف عليّه 

طبعا نانا طيبه بس حتي لو مكنتش طيبه كنت هعمل ايه ؟

 بس برضو كان صعب عليّه قوي

  انا ست ونانا ست وست شايفه نفسها وأوقات كتير كنت  بغير منها بس  في الحقيقة دلوقتي  انا ماليش غيرها وده كان  قبل فؤاد ما يتوفّي ودلوقتي كمان  برضو مليش غيرها 

وده اللي قررت اقبلّه واعملّه 

قلت خلاص هو جوزي حتى لو طلقني لاني كنت بحبه واستمريت في حبه 

ومش محتاجه اواجه الناس 

وحصل

 وكل اللي اعرفهم استغربوا ويتريقوا و هاجموني  كتير 

بس في الاخر عرفت ان بيتنا واحد لأن راجلنا واحد

 يعني طريقنا واحد اعتبرت نفسي انا ونانا زي شريط القطر وفؤاد  هو القطر اللي هيوصل ولادي للحياه اللي انا عايزاها لهم 

ودي كانت نقطة عمري ما قلتها لجوزي الله يرحمه

 لكن قلتها لنانا 

ومشيت الحياه معاه على كده  

بس المشكله اللي انا فيها هي

 ان انا علي الرغم من تعليمي العالي الا اني شبه أُميّه في الحياة  

ومفيش  عندي ثقه في اي قرار ممكن اخده 

حتى ولادي برضو انا مش صاحبة قرار قوي معاهم 

والظروف اللي انا فيها دلوقتي من غير فؤاد لازم اتعلم اعرف اخد قرار في حياتي 

طبعا رديت عليها وقلت لها

 ده موضوع سهل

 وان شاء الله نشتغل على بروتوكول الثقة في النفس والتطوير الشخصي 

وفعلا بدأت مع نسمة من حوالي شهر وهي بتتقدم جدا 

لكن انا عندي حاجات كتير في الجزء الروائي من شخصيتي هاقول جزء منها

عايزه اتكلم هنا عن قصة نسمة 

خلينا نشوف من الاول 

وهحاول  اكتبها علشان نحدد الصوره و نتعلم ونفهم منها 

اولا

 هتكلم عن الزوج (فؤاد) 

عريس ميسور الحال جامعي  اتقدم لبنت من عيله وميسورة الحال وجامعيه كان بيدور فيها عن ايه ؟

فلوسها مثلا؟؟!

 هو عنده فلوس يعني مش محتاج فلوسها 

ويمكن زياده الخير خيرين! 

شهاده عاليه علشان تناسبه علميا ؟

ده موجود عند نسمه!! 

بنت وحيده اهلها علشان يتجنب مشاكل النسب والاخوات ؟

نظرية تستحق الاحترام  والتقبل!!

كان عايز واحده مطيعه و مش بتاعة مشاكل ؟

نسمة كده بالظبط 

كان بيدور علي نسب مشرِف 

الاثنين مستواهم الاجتماعي متقارب 

كان عايز يكوّن عيله ؟

هو خلف من نسمة بس ! وما خلفش من نانا !!

يعني مفيش مشكله اصلا 

هل نسمة كانت شريكة حياة ؟؟

فعلا سؤال محتاج تفكير

طيب ازاي ينفصل  عن  نسمة في أول سنين جوازها ؟

ده كان بالنسبه له قرار مش رد فعل!!

 عن سوء معاملة من نسمة مثلا؟ 

طيب  ليه  إحتفظ بوجوده في حياة نسمة  ؟؟وما يتبعه من مسؤولية ومشاكل كان ممكن يخلص منها ؟

هل خلّي وجوده في حياة نسمة واعتمادها عليه حتى بعد الطلاق عشان تربي العيال ما تتجوزش بعده ؟

هل احتفظ  بمسؤوليته عن نسمة لأنه اعتبر نفسه مسؤول عن اختياره لها ؟ ومش ذنبها انه اختار غلط ؟

ثانيا نسمة 

نسمة كانت بتدور علي ايه ؟

هو عريس جامعي مناسب وغني زيها 

واجتماعيا العائلتين مناسبين 

إيه كمان؟

هل علشان نسمة بتحب فؤاد  قبلت الوضع الغريب في الطلاق !!

ولا كانت قليلة الحيلة ؟!

وهل  نسمة قبلت علشان خايفه من الوحدة (صح)

طيب ماهو كان ممكن تتجوز بعده !!!

هل طلقها علشان نسمة ماكنتش شخصية لها رأي معاه ؟!

 ولّا فؤاد مخافش من رد فعلها؟!

هل هو حس انه بيكلم نفسه لما لاقاها  موافقه على طول !؟

طيب ليه ماغيرتش من نفسها؟!!

ثالثا 

ليه دخلت نانا حياته ؟

الحقيقه 

هو اللي دخل حياة نانا 

هي ما جريتش وراه 

! 

قبلت تكون زوجة لزوج مطلق بس عايش مع ولاده نص الاسبوع 

هل علشان عندها اسبابها اللي بالنسبه لها مقنعة 

والحقيقة معنديش كلام كتير علي نانا 

لانها  كانت عارفه هى عايزه ايه ومحددة طريقها 

تحليلي الشخصي  للحالة

الحقيقة أن الزوج كان مختار زوجة من غير ما يعرفها 

وبعدين بعد الجواز اكتشفت انه بيكلّم نفسه

او ان  معاه شخص مش بيختلف معاه وده مش شريك حياته ✋

ده تابع 🤷‍♂️

19// فقرر ينفصل و  يشوف زوجة مختلفه

 أو يمكن هو اصبح عنده من الوعي انه يعرف طلباته في شريكة حياته

 ومكنتش واضحة لما راح يخطب نسمة . 

وطبعا ما طلقش نسمة بطريقة معتادة  لانه كان عنده اطفال منها وكمان لانه عارف ان نسمة مالهاش حد  بدليل أنه فضل مسؤول عنها 

طيب ليه ما سبهاش تعيش حياتها ؟

انانيه منه وتحكم فيها ؟

ويمكن شاف  أن نسمه مش مسؤله عن اختياره لها ( حتى لو كان غلط ) علشان كده قرر يتحمل النتيجة ؟؟! والمسؤولية بالنسبة لنسمه

بس دي انانيه لان نسمة ماشفتش جواز حقيقي!!

طيب نسمة ما كنتش عايزه تكون زوجه فعلا؟؟ ولا اكتفت بدور ام العيال ؟

هو فؤاد  اعتبر ان دي حياته وقدر يتعامل مع كل واحده فيهم حسب شخصيتها 

بس  هو حب نانا وكان مسؤول و بيعطف  على نسمة

وفضلت بينهم  حاجه زي كلمه العشرة مثلا !! 

وطبعا وجود اولاد في الجوازه كان رابط قوي بس ما يمنعش انه استقوي على نسمة وكان بيتحكم فيها حتي وهي طليقته

بس مش عارفه هل كان بيتحكم علشان مستضعفها ؟

ولا علشان مش واثق في تفكيرها ؟

وممكن يكون انه خايف انها ما تقدرش تربي الأولاد لوحدها 

 ثانيا بالنسبة لنسمه 

اعتقد انها كانت بتمر بمراحل في حياتها وصلتها للي هي فيه دلوقتي 

مثلا طفله وحيده اهلها بيخافوا عليها 

وخلّوا تجاربها محدودة وكمان غير مسؤولة عن حاجه

 فكانت النتيجة انها فعلا معرفتش تشارك زوجها في حياته (دي مرحله )

وبعدين عرفت انه عايز ينفصل عنها وكانت أضعف انسانيا انها تاخد رد فعل معاه هي قبلت وضع غريب  لانها خايفه من الوحدة قررت تقبل الانفصال  وتقبل الزوجه كمان(دي مرحله تانيه) 

وبعد كده  علاقة صداقة مع الزوجه التانيه وكمان اولاد الاتنين بيسافروا مع بعض؟؟

 عشان تثبت لنفسها والناس اللي  حواليها أنها مستقرة في حياتها وقادرة تتعامل على الرغم من جواز فواد ؟

وعلى الرغم أن فؤاد هو اللي بيدير حياتها وليحدث امتي تصيف و امتى ترجع من المصيف  

( مرحله تالته)

 هل ما اتجوزتش علشان تضمن الأولاد  يسندوها لو تخلّي عنها فؤاد

 او خوفها من الجواز نفسه كتجربة غير سعيده ومش عايزه تعيدها ؟

 هل كانت عارفه بينها وبين نفسها انها مش ماليّه عين فؤاد بالدرجة الكافية ؟ فخافت تجرب جواز تاني 

وكمان قبولها وتحليلها للحياه مع نانا انهم زي شريط السكة الحديد هل هو وعي كامل انها ما تقدرش لوحدها توصل اولادها للمستقبل اللي هي عايزاه؟؟ 

هل هي مغيرتش من نفسها لان التغيير دائما عايز مسؤولية وده حِمل هي مش قده؟!

 هل مكنتش واعية قوي ان الجواز انتهى لما الكلام انتهي بينها وبين جوزها  ؟؟

20// هل نسمة  كانت واعيه وفاهمه ان نانا شخصيه مش شريره وأنها طوق نجاه وداعم قوي علشان فؤاد يفضل مسؤولًا عنها و مرتبط بيها حتي لو من غير جواز لان نانا مش عايزه زوج ٢٤ ساعة ؟

 ثالثا  بالنسبة لنانا 

هل نانا كمان كانت ضعيفة؟

 لانها لقيت ان جوازها من فؤاد  يحميها من المتحرشين ومن تحكم اخوها فيها ؟

وكمان حد عنده اولاد وحياه تانيه لانها كانت اعتادت على الحياة لوحدها 

وكانت واعية لرغباتها ومش عايزه تضعف قدام راجل 

وكانت واثقه في حب فؤاد ليها لانها فهمت من الاول هو مفتقد اية وعملته وحافظت عليه و مضيعتش نفسها جواه 

وده ذكاء تُحسد عليه 

وما دخلتش نفسها في خلافات مع نسمة 

لانها اذكي من انها تعمل مشاكل او تحاول تحتفظ  بكل وقت فؤاد ليها لوحدها علشان تكون حره اكتر ؟

هل صداقتها لنسمه هي للحفاظ على الوضع كما هو عليه علشان مفيش حاجه تحصل تغير خططها؟

وهل  نانا استساغت  الوضع الخاص بنسمة على الرغم من النظرة المجتمعية لها؟ 

هل لإن  كل اللي فات ده كان أفضل من أرملة في كل الأحوال؟؟ 

هل هي فكرت كأم أن وجود أب 

لأولادها بالمستوى اللي يناسبها ويناسب أولادها أولوية وحافظت عليه علشان ما يفكرش فؤاد يرجع لنسمه خصوصا ان مفيش اولاد بينهم ؟

في الآخر 

اعتقد ان الجواز اللي مش مبني على الشراكة و التكافؤ والتواصل الإيجابي  مش ممكن يكون زواج صحي حتى لو لم ينتهي بالطلاق

وكان جواز نانا هو الجواز الصحي على الرغم من انها مش معاه كل ايام الاسبوع !

ومفيش اولاد من الجوازه دي ! و فؤاد ما كانش هو أول رجل في حياتها !!

وجواز نسمة كان زواج شكلي وليس حقيقي على الرغم انها عندها ٣ اولاد من جوازاتها !!

لكن مازلت في حيرة من فؤاد 

مش عارفه هل هو جاني أم مجني عليه؟

ربما جاني في نقطة

زي إنه استسهل الجواز بنانا  عن وتطبيق نسمة على انه يغيرها 

ويساعدها  أنها تثق في نفسها !!

وزود عندها اكتر عدم الثقة في نفسها ويمكن في الجواز كمشروع 

بس برضو هو فضل مسؤول عنها ورحم ضعفها 

21// 

بس برضه مقدرش يضحي باحتياجاته وسعي للجواز

وليه  كان مستقوّي على نسمة ؟ حتى بعد الطلاق ؟؟

ولّا نسمة فعلا ماتعلمتش تمسك بيت ؟!

وكان لازم يكون كده معاها علشان لما يكون مع نانا يكون متأكد ان البيت ماشي زي ماهو عايز؟ 

طيب نانا ظلمت نسمة ؟

لانها كانت الزوجه اللي عايزها فؤاد جوزها ؟

ومنعت حتى جوه عقل فؤاد أنه  يفكر يرجع لنسمه !!

دي اسئله لها معنى

 بس ملهاش اجابه

 وهتفضل  مجرد تساؤلات  للتفكير والوعي وللتعليم

 كمان  

يمكن كان وجود نانا بشخصيتها  هو رمانة الميزان اللي حافظت على نسمة أولادها من ضياع الاب مع سيدة اخرى 

ست تانيه غير نانا ربما تسهل له التخلي عن نسمة بحكم انها طليقته مش مراته ؟ 

أو بطريقه تانيه   حافظت على الأسرة الأولي حتي في حالة الانفصال

طيب هل ممكن نانا تكون بهذا الذكاء اللي يخليها متحكمه في حياه نسمه علشان هي كمان عارفه ان نسمة ضعيفه وكمان تضمن فؤاد في حياتها علشان ولادها هي 

وماذا  لو تم مشروع جواز ولاد نانا من بنات نسمة؟

مش عارفه انا شايفه ان الاتنين كانوا محتاجين بعض زي نسمة ما قالت شريطين القطار 

 كل واحده فيهم كانت رمانه الميزان بالنسبة للأخرى 

لذلك

 ليس كل ما يزعجنا شر 

احيانا يكون الشر الظاهري هو الخير في واقع الأمر

وللقصة بقية … يتم النشر الجزء الجديد يوم الجمعة من كل اسبوع

تابعوا إصدار كتاب نون بكل أنواع التشكيل